Kismaayo (Idaacadda Waamo)-Southampton oo taako u dhigtay kooxda Manchester City oo marti ugu ahayd garoonka Saint Mary’s, kaddib markii ay ku kala baxeen barbardhac 1-1 ah, ciyaar qeyb ka ahayd kulammada toddobaadkan ee horyaalka Premier League.
Qeybta hore ee ciyaarta ayaa lagu kala nastay 1-0 ay ku hoggaamineysay kooxda martida loo ahaa ee Southampton.
Daqiiqadii 7-aad kooxda kubadda cagta ee Southampton ayaa hoggaanka u qabatay ciyaarta waxaana 1-0 ka dhigay laacibkooda Kyle Walker-Peters kaddib markii uu caawin ka helay saaxiibkiis Nathan Redmond.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
65 daqiiqo marka ay ciyaarta mareysay kooxda Manchester City ayaa dhalisay goolka barbardhaca waxaana 1-1 ka dhigay dheesha Aymeric Laporte oo caawinta goolkan ka ehalay saaxiibkiis Kevin De Bruyne.
Ugu dambeyntii ciyaarta ayaa ku dhammaatay barbardhac 1-1 ah ay ku kala baxeen labada kooxood Southampton iyo Manchester City, kaddib ciyaar aad u xiiso badan ay ku wada ciyaareen garoonka Saint Mary’s.