Kismaayo(Idaacadda Waamo)-Madaxweynaha Soomaaliya Xasan Sheekh Maxamuud iyo dhiggiisa Masar, Cabdulfataax Al-Sisi, ayaa kulan muhiim ah oo ay ku yeesheen Qasriga Al-Itixaadiya ee magaalada Qaahira, ku kala saxiixday heshiisyo ay ku xoojinayaan xiriirka labada waddan.
Sida lagu sheegay qoraal ay daabacday Wakaaladda Wararka Soomaaliyeed ee SONNA, labada madaxweyne waxay isku afgarteen in sare loo qaado xiriirka Iskaashi ee Soomaaliya iyo Masar oo la gaarsiiyo heer istaraatiiji ah.
Sida qoraalka lagu sheegay, heshiiskan ayaa ka tarjumaya xiriirka qotoda dheer ee taariikhiga ah ee u dhexeeya labada dal iyo sida ay uga go’an tahay horumarinta iskaashiga dhinacyada kala duwan, sida waxbarashada, cadaaladda, siyaasadda, amniga, iyo dhaqaalaha.