Kismaayo(Idaacadda Waamo)-Kooxda Real Madrid ayaa guul soo laabasho leh ka gaartay Kooxda reer italy ee Ac Milan kulan ka tirsan kulumada isku diyaarinta xilli ciyaareedka cusub ee 2023/24.
Tababare Ancelotti ayaa shaxdiisa kusoo bilaabay 3 Xiddig oo kooxdiisa ku cusub kuwaa oo kala ahaa Bellingham, Diaz iyo Joselu, Tababaraha ayaa iska badal ku sameeyay shaxdiisa kulankan.
Kooxda Ac Milan ayaa goolasha ku hormartay daqiiqadii 25-aad waxaana u dhaliyey goolka 1-aad Xiddiga Fikiyo Tomori, goolka 2-aadna waxaa dhaliyey Xiddiga Luka Romero daqiiqadii 42-aad.
Waxa sidaas ku dhamataay qaybta hore ee ciyaarta oo ay Ac Milan ka gacan sarayso Kooxda Real Madrid.
Qaybta dambe ayay Real Madrid wacdaro la soo baxday iyaga oo doonayay in ay ku soo laabtaan natiijaada ciyaarta.
Kooxda Real Madrid ayaa goolal is daba joog ah ku barbareysay goolashii ay la hormartay Kooxda AC Milan, daqiiqadihii 57-aad iyo 59-aad ayuu Xiddiga Federico Valverde dhaliyey goolashii barbaraha ahaa.
Halka goolka guusha ay Real Madrid la timid daqiiqadii 84-aad waxaana u dhaliyey Xiddiga Vini Jr, ciyaarta ayaa kusoo dhamaatay 3-2 oo ay Real Madrid guul soo laabasho leh ka gaartay Kooxda AC Milan.