Kismaayo-(Idaacadda Waamo)-Kooxda Real Madrid ayaa garaacday Barcelona iskana xaadirisay final-ka Copa Del Rey-ga kulan ka dhacay garoonka Camp Nou.
Barcelona ayaa kulanka soo gashay iyaga oo kulankii hore ku soo badiyay 1/0 isla markaas aan dareemayn cadaadis xoogan.
Dhanka kale Real Madrid ayaa kulanka soo gashay iyaga oo doonayay in ay ku soo laabtaan ciyaarta isla markaas doonayay in ay ciyaarta marka hore bar-baro ka dhigaa.
Kadib dadaalo badan o ay samaysay Real Madrid daqiiqadii 45+1-aad ayay dhalisay goolka 1-aad ee ciyaarta waxana u dhaliyay xiddiga Vini Jr kaas oo hogaanka u dhiibay kooxdiisa.
Waxa sidaas ku dhamaatay qaybta hore ee ciyaarta oo ay Real Madrid ahayd kooxda fiican una qalantay hogaanka ay ciyaarta u qabatay.
Daqiiqadii 50-aad ayay Real dhalisa goolka 2-aad waxana u dhaliyay xiddiga Karim Benzema kaas oo hogaanka u dheereeyay kooxdiisa ciyaartana ka dhigay 2/0.
Xiddiga Karim Benzema ayaa gool dhaliyay kadib markii rikoodhe loo dhigay kooxdiisa waxana uu dhaliyay goolkiisii 2-aad ee ciyaarta iyo goolkii 3-aad ee kooxdiisa.
Daqiiqadii 80-aad ayay Real Madrid dhalisay goolka 4-aad waxana u dhaliyay xiddiga Karim Benzema oo dhamaystiray saddexley ciyaartana ka dhigay 4/0 ay Real Madrid ku hogaaminayso ciyaarta.
Waxa sidaas ku dhamaatay ciyaarta oo ay Real Madrid iska xaadirisay final-ka Copa Del Rey-ga xilli ay ka aarsatay Barcelona oo ka badisay kulamadii ugu dambeeyay.