Kismaayo-(Idaacadda Waamo)-Isku-aadka semi-finalka tartanka Copa del Rey ayaa la shaaciyey, waxaanay mar kale taageereyaashu nasiib u yeelanayaan inay daawadaan El Clasico iyadoo tirada kulamada kooxaha Real Madrid iyo Barcelona ay foodda isku-darayaan xilli ciyaareedkan ay noqonayaan shan kulan.
Laba ciyaarood oo laba lugood ah ayay Real Madrid iyo Barcelona ku kala bixi doonaan, waxaanay midkooda soo gudubtaa finalka ugu tegi doontaa Osasuna iyo Athletic Bilbao oo loo aqbalay ducadoodii ahayd inay ka badbaadaan naadiyada awoodda badan, balse iyagana ay midkood soo bixi doonto.
Qori-tuur la sameeyay, ayaa waxa uu nasiibku isku beegay Real Madrid iyo Barcelona oo laba toddobaad ka hor ku kulmay finalka Spanish Super Cup oo ay Barcelona si xun ugu karbaashtay Real Madrid.
Tartankan oo wareegyadiisa hore ay kooxuhu ku kala baxaan min hal ciyaar ayaa isbeddel lagu sameeyaa marka lasoo gaadho semi-finalka, waxaana laga dhigaa laba ciyaarood oo labada garoon midba mar la tago, taas oo finalkana ay tagto kooxda isku-darka labada lugood ku goolal badata.